ادخل ومتع عينيك وانسى اهمومك

[center]يا حسراه عليك يا الخضراء فيك حكاية وحكايات
ساميني وقعدي حدايا....... واحكيهملي بثبات
علاش هكذا اصبحت خاسرة ظلي تبدلي في الصفات
تعذبي فينا غير بشوية ..عييت من زعافك براكات

هادو سنين وانت هايمة لا راعي ولا رعاة
تلعبي بيا والا معايا ..جاوبيني علاش هاذ السكات

اصبحت ديما ماكي رابحة ... شبعتينا غير خسارات

فرحتينا هادي مدة ..وفي ام درمان حبست لحسابات

راح سعدان جا بن شيخة .. راه بالسعد بالشيخات

كنا نخسرو .1. 2 وتلاثة . ولينا غير بالربعات
بغاو يمسحوا منك الوطنية وانا الوطن سكن لي في الذات

امشينا معاك لطرف الدنيا ....بدراهمنا ولا اعانات
التذكيرة خلصتها غالية ديت معايا شي تمرات

دخلت للملعب صفقوا علي طلع صياح وهتافات
طمعتيني ودرتي علي طمعت فالفوز جيبتيلي الربعات

المدرب غفل غفلة.. فليلتو مالقى وين يبات

قال نروح لفرنسا الدعوة راهي تزاكات
وكلتي لاعبين عسل وفاكية والمناصر شمختيلو الفتات
المناصر خدا الكية وحياتو من الفرحة خوات
ولا الشعب لحياتو العادية ..لقا غير مشاكل وكيات

ما فهم واش صار ..راح احوس على خبيزات
المسجون يرجى الحرية بالدقيقة يحسب لوقات
الشهار يحلم بالشهرية يا حليلو مولا وليدات
كبدة الشعب راهي مكوية على واش سهرت واش عدات
على ولاد الخضراء نساو الوطنية عجبهوم زين المراكشيات
خلاو بلادي وحدانية من الخسارة والبكا تعمات
باش يبينونا الرجولية ..قالونا البالو ربح وخسارات

ما بغاو يواجهوا هدا الشعب ..غير الهروب والهربات

نهار كانت الدنيا دنيا.. الشعب علقلهم شيعات

واليوم وجوه الخسارة هربوا ..شي حراق شي بالفيزات
اليوم الخضراء راهي مرمية في مراكز الشيخوخات

المسؤلين دارو جمعية سماوها دخلات وخرجات

قالوا الجزائرية بطنها خاوية ما نجبت ولا ربات

شافو الحل فالاجنبية يا ناس .. واش من اهانات


الشعب كره من الخلوطية جا يصلي تلفتلو الصلاة
كي سلم انسى التحية.. وكي كمل تفكر الربعات
مدرب رايح لاخر جاي .. فاتت جناس وتمحات
والمسؤولين مادارو النية حاكمين فالكرسي حكمات

قالوا خاطينا المسؤلية .. رانا وفرنا كل الإمكانيات
صابوا العلة فالمحلي . فيه مسحوا الموس مسحات

نصيحتي نتركها التالية باش نختم بيها لبيات
يا ناس رحمو ا هدا الشعب راكم اديتوا كل الخيرات

خلاص وقت الديماغوجية و جا وقت التغييرات

باغيين اكيب تكون قوية كي ليام لي عدات

تبدال المدرب وحدوا ماهوش حل .. لازم تتبدل الدهنيات
الخضراء كنز وبلادي غالية والباقي كله كذوبات